template083

Compositions

TRISTEZA D’MAE Tchora bu magua Bu abrasa solidon Sodadi bu fidju Ki bai pa strangeru E tristi pamodi Bu katem notisia Ninguem kapodi dau Konta di bu fidju Koitadu mamai Riba po di kama Ta mori d’sodadi Ku ansiedadi di odjau. Papai mori bedju Ku bu nomi na boka Kurason ta sangra Ku vontadi abrasau Ki magua tom grandi Ingratidon di fidju Na sonhu di aventura Ta brasa amargura Nu po kabesa na tchom Nu examina konsensia Pa nu podi xinti pena Di nos djentis grandi. Joao Cerilo P Monteiro	VIDA KONSAGRADU Deus Salvador di mundu Senhor di universu Konsagra nha vida Pam xinti sosegu Baxu di ceu azul. Mandam benson Um Anjo di nha guarda Pa xinti abensuadu Sima filizardu. Kabu dexam na boia Ta piska milagri Pamo Nteni medu Di morti nafragadu Nta pidiu sokoru Di korti celestial Pam ka fika supultadu Na abismo di solidon Fladu mar e ton fundu Mas nha dor mas prufundu K’es distinu malvadu Tenen kondenadu Ta kurti pinitensia Nes agua salvagem Na forsa di tempural Joao Cerilo P Monteiro	Nha Propi Alma Num sonu prufundu N’obi um voz Na nha sonhu Ta proklama liberdadi. Instantaniamenti nodja um luz Ta ilumina na universu Pasarinha bem ta pasa Ta kanta hinu di amor. Kantu n’disperta pam sakuta Nha kurason palpita forti N'abri odju pam labanta Staba um Anjo na nha ladu N’odja um strela ta brilha Na splendor di si olhar Nha kurason tchora mimosa Ku magua di ternura. Nunka nha odjus Tinha tchoradu Di tantu imuson E fortaleza Na kel momentu N’skesi di mundu Afinal era nha propi alma Ki staba proklamaba amor di Deus. Joao Cerilo P. Monteiro